Өзбекстан футбол құрамасының қорғаушысы Абдукодир Хусанов француздың “Ланс” лигасынан ағылшынның премьер-лигасына ауысып, “Манчестер Ситиде” ойнамақ.
Футбол шолушысы Фабрицио Романоның айтуынша, келісім құны 40 млн еуро және оған қоса бонусы да бар. 20 жастағы өзбек футболшысымен келісім 2029 жылға дейін жасалған. Жақын арада ол медициналық тексерістен өтеді.
Трансфер құнын The Athletic те растады. Басылымның жазуынша, Өзбекстан құрамасының орталық қорғаушысы “Манчестер Ситидің” бас бапкері Пеп Гвардиола үшін “артқы шепті нығайтуда жасаған негізгі қадамы” болған.
Дереккөздердің айтуынша, ағылшын клубы Хусановты алу үшін біраз күш салған. Онымен келісім жасауға сонымен бірге мадридтік “Реал”, француздың PSG, Англияның жоғарғы дивизионынан тағы екі клуб – «Тоттенхэм» мен «Ньюкасл» ынта білдірген.
Трансфер құнын ескерсек, Хусанов Өзбекстанның футбол тарихындағы ең қымбат футболшы ғана емес, ағылшынның премьер-лигасында ойнайтын Орталық Азиядан шыққан жалғыз футболшы болмақ.
Абдукодир Хусанов ташкенттік “Бунедкор” клубынан шыққан. Әкесі Хикмат Хашимов Өзбекстанның ұлттық құрамасының бұрынғы ойыншысы.
Футбол сарапшысы Әлішер Никимбаевтың пікірінше, Хусанов жағдайында “Бунедкор” клубы шамамен 1 млн доллар алмақ, себебі трансфер көлемінің 5 пайызы ойыншы 12 мен 21 жас аралығында жаттыққан клубтарға үлестірілмек. Дегенмен футболшы клубтан 18 жасында кеткендіктен сома көлемі азырақ та болуы мүмкін.
“Бұл біздің клубтарымыз мұндай ойыншылардан неге көз жазып қалады және оларды өзіміздің елде дамытуға не кедергі деген сұрақты туындатады” деді сарапшы.
Хусанов Өзбекстанның жастар құрамасында ойнап, 2023 жылы команда Азия кубогында күміс ұтып алған. Қазір ол ұлттық құрамада ойнап жүр. Өзбек командасы 2026 жылғы футболдан әлем чемпионатына іріктеуден өтуге жақын тұр - Өзбекстан өз тобында БАӘ мен Катардан озып, екінші орында тұр.
Хусанов 2023 жылы белорустың "Энергетик-БГУ" футбол клубынан "Лансқа" ауысқан. Сол кезде трансфер құны 100 мың еуро болған. Le 11 HDF порталының жазуынша, ол 2024 жылы француз клубының ең үздік ойыншысы атанған.